11:2 הוֹשִׁ֣יעָה יְ֭הוָה כִּי־גָמַ֣ר חָסִ֑יד * כִּי־פַ֥סּוּ אֱ֝מוּנִ֗ים מִבְּנֵ֥י אָדָֽם׃
11:3 שָׁ֤וְא ׀ יְֽדַבְּרוּ֮ אִ֤ישׁ אֶת־רֵ֫עֵ֥הוּ * שְׂפַ֥ת חֲלָק֑וֹת בְּלֵ֖ב וָלֵ֣ב יְדַבֵּֽרוּ׃
11:4 יַכְרֵ֣ת יְ֭הוָה כָּל־שִׂפְתֵ֣י חֲלָק֑וֹת * לָ֝שׁ֗וֹן מְדַבֶּ֥רֶת גְּדֹלֽוֹת׃
11:5 אֲשֶׁ֤ר אָֽמְר֨וּ ׀ לִלְשֹׁנֵ֣נוּ נַ֭גְבִּיר † שְׂפָתֵ֣ינוּ אִתָּ֑נוּ * מִ֖י אָד֣וֹן לָֽנוּ׃
11:6a מִשֹּׁ֥ד עֲנִיִּים֮ מֵאַנְקַ֢ת אֶבְי֫וֹנִ֥ים * עַתָּ֣ה אָ֭קוּם יֹאמַ֣ר יְהוָ֑ה׃
11:6b אָשִׁ֥ית בְּ֝יֵ֗שַׁע * יָפִ֥יחַֽ לֽוֹ׃
11:7 אִֽמֲר֣וֹת יְהוָה֮ אֲמָר֢וֹת טְהֹ֫ר֥וֹת † כֶּ֣סֶף צָ֭רוּף בַּעֲלִ֣יל לָאָ֑רֶץ * מְ֝זֻקָּ֗ק שִׁבְעָתָֽיִם׃
11:8 אַתָּֽה־יְהוָ֥ה תִּשְׁמְרֵ֑ם * תִּצְּרֶ֓נּוּ ׀ מִן־הַדּ֖וֹר ז֣וּ לְעוֹלָֽם׃
11:9 סָבִ֗יב רְשָׁעִ֥ים יִתְהַלָּכ֑וּן * כְּרֻ֥ם זֻ֝לּ֗וּת לִבְנֵ֥י אָדָֽם׃
