111:1 אַשְׁרֵי־אִ֭ישׁ יָרֵ֣א אֶת־יְהוָ֑ה * בְּ֝מִצְוֺתָ֗יו חָפֵ֥ץ מְאֹֽד׃
111:2 גִּבּ֣וֹר בָּ֭אָרֶץ יִהְיֶ֣ה זַרְע֑וֹ * דּ֖וֹר יְשָׁרִ֣ים יְבֹרָֽךְ׃
111:3 הוֹן־וָעֹ֥שֶׁר בְּבֵית֑וֹ * וְ֝צִדְקָת֗וֹ עֹמֶ֥דֶת לָעַֽד׃
111:4 זָ֘רַ֤ח בַּחֹ֣שֶׁךְ א֭וֹר לַיְשָׁרִ֑ים * חַנּ֖וּן וְרַח֣וּם וְצַדִּֽיק׃
111:5 טֽוֹב־אִ֭ישׁ חוֹנֵ֣ן וּמַלְוֶ֑ה † יְכַלְכֵּ֖ל דְּבָרָ֣יו בְּמִשְׁפָּֽט׃ * כִּֽי־לְעוֹלָ֥ם לֹא־יִמּ֑וֹט׃
111:7a לְזֵ֥כֶר ע֝וֹלָ֗ם יִהְיֶ֥ה צַדִּֽיק׃ * מִשְּׁמוּעָ֣ה רָ֭עָה לֹ֣א יִירָ֑א׃
111:7b נָכ֥וֹן לִ֝בּ֗וֹ בָּטֻ֥חַ בַּיהוָֽה׃ † סָמ֣וּךְ לִ֭בּוֹ לֹ֣א יִירָ֑א * עַ֖ד אֲשֶׁר־יִרְאֶ֣ה בְצָרָֽיו׃
111:9 פִּזַּ֤ר ׀ נָ֘תַ֤ן לָאֶבְיוֹנִ֗ים † צִ֭דְקָתוֹ עֹמֶ֣דֶת לָעַ֑ד * קַ֝רְנ֗וֹ תָּר֥וּם בְּכָבֽוֹד׃
111:10 רָ֘שָׁ֤ע יִרְאֶ֨ה ׀ וְכָעָ֗ס שִׁנָּ֣יו יַחֲרֹ֣ק וְנָמָ֑ס * תַּאֲוַ֖ת רְשָׁעִ֣ים תֹּאבֵֽד׃
