121:1 שָׂ֭מַחְתִּי בְּאֹמְרִ֣ים לִ֑י * בֵּ֖ית יְהוָ֣ה נֵלֵֽךְ׃
121:2 עֹ֭מְדוֹת הָי֣וּ רַגְלֵ֑ינוּ * בִּ֝שְׁעָרַ֗יִךְ יְרוּשָׁלָֽ͏ִם׃
121:3 יְרוּשָׁלַ֥͏ִם הַבְּנוּיָ֑ה * כְּ֝עִ֗יר שֶׁחֻבְּרָה־לָּ֥הּ יַחְדָּֽו׃
121:4 שֶׁשָּׁ֨ם עָל֪וּ שְׁבָטִ֡ים שִׁבְטֵי־יָ֭הּ עֵד֣וּת לְיִשְׂרָאֵ֑ל * לְ֝הֹד֗וֹת לְשֵׁ֣ם יְהוָֽה׃
121:5 כִּ֤י שָׁ֨מָּה ׀ יָשְׁב֣וּ כִסְא֣וֹת לְמִשְׁפָּ֑ט * כִּ֝סְא֗וֹת לְבֵ֣ית דָּוִֽיד׃
121:6 שַׁ֭אֲלוּ שְׁל֣וֹם יְרוּשָׁלָ֑͏ִם * יִ֝שְׁלָ֗יוּ אֹהֲבָֽיִךְ׃
121:7 יְהִֽי־שָׁל֥וֹם בְּחֵילֵ֑ךְ * שַׁ֝לְוָ֗ה בְּאַרְמְנוֹתָֽיִךְ׃
121:8 לְ֭מַעַן אַחַ֣י וְרֵעָ֑י * אֲדַבְּרָה־נָּ֖א שָׁל֣וֹם בָּֽךְ׃
121:9 לְ֭מַעַן בֵּית־יְהוָ֣ה אֱלֹהֵ֑ינוּ * אֲבַקְשָׁ֖ה ט֣וֹב לָֽךְ׃
