129:1 מִמַּעֲמַקִּ֖ים קְרָאתִ֣יךָ יְהוָֽה׃ * אֲדֹנָי֮ שִׁמְעָ֢ה בְק֫וֹלִ֥י׃
129:2 תִּהְיֶ֣ינָה אָ֭זְנֶיךָ קַשֻּׁב֑וֹת * לְ֝ק֗וֹל תַּחֲנוּנָֽי׃
129:3 אִם־עֲוֺנ֥וֹת תִּשְׁמָר־יָ֑הּ * אֲ֝דֹנָ֗י מִ֣י יַעֲמֹֽד׃
129:4 כִּֽי־עִמְּךָ֥ הַסְּלִיחָ֑ה * לְ֝מַ֗עַן תִּוָּרֵֽא׃
129:5 קִוִּ֣יתִי יְ֭הוָה קִוְּתָ֣ה נַפְשִׁ֑י * וְֽלִדְבָר֥וֹ הוֹחָֽלְתִּי׃
129:6 נַפְשִׁ֥י לַֽאדֹנָ֑י * מִשֹּׁמְרִ֥ים לַ֝בֹּ֗קֶר שֹׁמְרִ֥ים לַבֹּֽקֶר׃
129:7 יַחֵ֥ל יִשְׂרָאֵ֗ל אֶל־יְה֫וָה * כִּֽי־עִם־יְהוָ֥ה הַחֶ֑סֶד וְהַרְבֵּ֖ה עִמּ֣וֹ פְדֽוּת׃
129:8 וְ֭הוּא יִפְדֶּ֣ה אֶת־יִשְׂרָאֵ֑ל * מִ֝כֹּ֗ל עֲוֺנֹתָֽיו׃
