145:2a הַֽלְלִ֥י נַ֝פְשִׁ֗י אֶת־יְהוָֽה׃ † אֲהַלְלָ֣ה יְהוָ֣ה בְּחַיָּ֑י * אֲזַמְּרָ֖ה לֵֽאלֹהַ֣י בְּעוֹדִֽי׃
145:2b אַל־תִּבְטְח֥וּ בִנְדִיבִ֑ים * בְּבֶן־אָדָ֓ם ׀ שֶׁ֤אֵֽין ל֥וֹ תְשׁוּעָֽה׃
145:4 תֵּצֵ֣א ר֭וּחוֹ יָשֻׁ֣ב לְאַדְמָת֑וֹ * בַּיּ֥וֹם הַ֝ה֗וּא אָבְד֥וּ עֶשְׁתֹּנֹתָֽיו׃
145:5 אַשְׁרֵ֗י שֶׁ֤אֵ֣ל יַעֲקֹ֣ב בְּעֶזְר֑וֹ † שִׂ֝בְר֗וֹ עַל־יְהוָ֥ה אֱלֹהָֽיו׃ * עֹשֶׂ֤ה ׀ שָׁ֘מַ֤יִם וָאָ֗רֶץ אֶת־הַיָּ֥ם וְאֶת־כָּל־אֲשֶׁר־בָּ֑ם הַשֹּׁמֵ֖ר אֱמֶ֣ת לְעוֹלָֽם׃
145:7a עֹשֶׂ֤ה מִשְׁפָּ֨ט ׀ לָעֲשׁוּקִ֗ים † נֹתֵ֣ן לֶ֭חֶם לָרְעֵבִ֑ים * יְ֝הוָ֗ה מַתִּ֥יר אֲסוּרִֽים׃
145:7b יְהוָ֤ה ׀ פֹּ֘קֵ֤חַ עִוְרִ֗ים * יְ֭הוָה זֹקֵ֣ף כְּפוּפִ֑ים יְ֝הוָ֗ה אֹהֵ֥ב צַדִּיקִֽים׃
145:9 יְהוָ֤ה ׀ שֹׁ֘מֵ֤ר אֶת־גֵּרִ֗ים † יָת֣וֹם וְאַלְמָנָ֣ה יְעוֹדֵ֑ד * וְדֶ֖רֶךְ רְשָׁעִ֣ים יְעַוֵּֽת׃
145:10 יִמְלֹ֤ךְ יְהוָ֨ה ׀ לְעוֹלָ֗ם אֱלֹהַ֣יִךְ צִ֭יּוֹן * לְדֹ֥ר וָדֹ֗ר הַֽלְלוּ־יָֽהּ׃
