147:1 שַׁבְּחִ֣י יְ֭רוּשָׁלִַם אֶת־יְהוָ֑ה * הַֽלְלִ֖י אֱלֹהַ֣יִךְ צִיּֽוֹן׃
147:2 כִּֽי־חִ֭זַּק בְּרִיחֵ֣י שְׁעָרָ֑יִךְ * בֵּרַ֖ךְ בָּנַ֣יִךְ בְּקִרְבֵּֽךְ׃
147:3 הַשָּׂם־גְּבוּלֵ֥ךְ שָׁל֑וֹם * חֵ֥לֶב חִ֝טִּ֗ים יַשְׂבִּיעֵֽךְ׃
147:4 הַשֹּׁלֵ֣חַ אִמְרָת֣וֹ אָ֑רֶץ * עַד־מְ֝הֵרָ֗ה יָר֥וּץ דְּבָרֽוֹ׃
147:5 הַנֹּתֵ֣ן שֶׁ֣לֶג כַּצָּ֑מֶר * כְּ֝פ֗וֹר כָּאֵ֥פֶר יְפַזֵּֽר׃
147:6 מַשְׁלִ֣יךְ קַֽרְח֣וֹ כְפִתִּ֑ים * לִפְנֵ֥י קָ֝רָת֗וֹ מִ֣י יַעֲמֹֽד׃
147:7 יִשְׁלַ֣ח דְּבָר֣וֹ וְיַמְסֵ֑ם * יַשֵּׁ֥ב ר֝וּח֗וֹ יִזְּלוּ־מָֽיִם׃
147:8 מַגִּ֣יד דְּבָרָ֣יו לְיַעֲקֹ֑ב * חֻקָּ֥יו וּ֝מִשְׁפָּטָ֗יו לְיִשְׂרָאֵֽל׃
147:9 לֹ֘א עָ֤שָׂה כֵ֨ן ׀ לְכָל־גּ֗וֹי * וּמִשְׁפָּטִ֥ים בַּל־יְדָע֗וּם הַֽלְלוּ־יָֽהּ׃
