4:2a בְּקָרְאִ֡י עֲנֵ֤נִי ׀ אֱלֹ֘הֵ֤י צִדְקִ֗י * בַּ֭צָּר הִרְחַ֣בְתָּ לִּ֑י׃
4:2b חָ֝נֵּ֗נִי * וּשְׁמַ֥ע תְּפִלָּתִֽי׃
4:3 בְּנֵ֥י אִ֡ישׁ עַד־מֶ֬ה כְבוֹדִ֣י לִ֭כְלִמָּה * תֶּאֱהָב֣וּן רִ֑יק תְּבַקְשׁ֖וּ כָזָ֣ב סֶֽלָה׃
4:4 וּדְע֗וּ כִּֽי־הִפְלָ֣ה יְ֭הוָה חָסִ֣יד ל֑וֹ * יְהוָ֥ה יִ֝שְׁמַ֗ע בְּקָרְאִ֥י אֵלָֽיו׃
4:5 רִגְז֗וּ וְֽאַל־תֶּ֫חֱטָ֥אוּ † אִמְר֣וּ בִ֭לְבַבְכֶם עַֽל־מִשְׁכַּבְכֶ֗ם * וְדֹ֣מּוּ סֶֽלָה׃
4:6 זִבְח֥וּ זִבְחֵי־צֶ֑דֶק * וּ֝בִטְח֗וּ אֶל־יְהוָֽה׃
4:7 רַבִּ֥ים אֹמְרִים֮ מִֽי־יַרְאֵ֢נ֫וּ ט֥וֹב * נְֽסָה־עָ֭לֵינוּ א֨וֹר פָּנֶ֬יךָ יְהוָֽה׃
4:8 נָתַ֣תָּה שִׂמְחָ֣ה בְלִבִּ֑י * מֵעֵ֬ת דְּגָנָ֖ם וְתִֽירוֹשָׁ֣ם רָֽבּוּ׃
4:9 בְּשָׁל֣וֹם יַחְדָּו֮ אֶשְׁכְּבָ֢ה וְאִ֫ישָׁ֥ן * כִּֽי־אַתָּ֣ה יְהוָ֣ה לְבָדָ֑ד לָ֝בֶ֗טַח תּוֹשִׁיבֵֽנִי׃
