46:2 כָּֽל־הָ֭עַמִּים תִּקְעוּ־כָ֑ף * הָרִ֥יעוּ לֵ֝אלֹהִ֗ים בְּק֣וֹל רִנָּֽה׃
46:3 כִּֽי־יְהוָ֣ה עֶלְי֣וֹן נוֹרָ֑א * מֶ֥לֶךְ גָּ֝דוֹל עַל־כָּל־הָאָֽרֶץ׃
46:4 יַדְבֵּ֣ר עַמִּ֣ים תַּחְתֵּ֑ינוּ * וּ֝לְאֻמִּ֗ים תַּ֣חַת רַגְלֵֽינוּ׃
46:5 יִבְחַר־לָ֥נוּ אֶת־נַחֲלָתֵ֑נוּ * אֶ֥ת גְּא֨וֹן יַעֲקֹ֖ב אֲשֶׁר־אָהֵ֣ב סֶֽלָה׃
46:6 עָלָ֣ה אֱ֭לֹהִים בִּתְרוּעָ֑ה * יְ֝הֹוָ֗ה בְּק֣וֹל שׁוֹפָֽר׃
46:7 זַמְּר֣וּ אֱלֹהִ֣ים זַמֵּ֑רוּ * זַמְּר֖וּ לְמַלְכֵּ֣נוּ זַמֵּֽרוּ׃
46:8 כִּ֤י מֶ֖לֶךְ כָּל־הָאָ֥רֶץ אֱלֹהִ֗ים * זַמְּר֥וּ מַשְׂכִּֽיל׃
46:9 מָלַ֣ךְ אֱ֭לֹהִים עַל־גּוֹיִ֑ם * אֱ֝לֹהִ֗ים יָשַׁ֤ב ׀ עַל־כִּסֵּ֬א קָדְשֽׁוֹ׃
46:10 נְדִ֘יבֵ֤י עַמִּ֨ים ׀ נֶאֱסָ֗פוּ עַם֮ אֱלֹהֵ֢י אַבְרָ֫הָ֥ם * כִּ֣י לֵֽ֭אלֹהִים מָֽגִנֵּי־אֶ֗רֶץ מְאֹ֣ד נַעֲלָֽה׃
