51:3 מַה־תִּתְהַלֵּ֣ל בְּ֭רָעָה הַגִּבּ֑וֹר * חֶ֥סֶד אֵ֝֗ל כָּל־הַיּֽוֹם׃
51:4 הַ֭וּוֹת תַּחְשֹׁ֣ב לְשׁוֹנֶ֑ךָ * כְּתַ֥עַר מְ֝לֻטָּ֗שׁ עֹשֵׂ֥ה רְמִיָּֽה׃
51:5 אָהַ֣בְתָּ רָּ֣ע מִטּ֑וֹב * שֶׁ֓קֶר ׀ מִדַּבֵּ֖ר צֶ֣דֶק סֶֽלָה׃
51:6 אָהַ֥בְתָּ כָֽל־דִּבְרֵי־בָ֗לַע * לְשׁ֣וֹן מִרְמָֽה׃
51:7 גַּם־אֵל֮ יִתָּצְךָ֢ לָ֫נֶ֥צַח † יַחְתְּךָ֣ וְיִסָּחֲךָ֣ מֵאֹ֑הֶל * וְשֵֽׁרֶשְׁךָ֨ מֵאֶ֖רֶץ חַיִּ֣ים סֶֽלָה׃
51:8 וְיִרְא֖וּ צַדִּיקִ֥ים וְיִירָ֗אוּ * וְעָלָ֥יו יִשְׂחָֽקוּ׃
51:9 הִנֵּ֤ה הַגֶּ֗בֶר לֹ֤א יָשִׂ֥ים אֱלֹהִ֗ים מָֽע֫וּזּ֥וֹ † וַ֭יִּבְטַח בְּרֹ֣ב עָשְׁר֑וֹ * יָ֝עֹ֗ז בְּהַוָּתֽוֹ׃
51:10 וַאֲנִ֤י ׀ כְּזַ֣יִת רַ֭עֲנָן בְּבֵ֣ית אֱלֹהִ֑ים * בָּטַ֥חְתִּי בְחֶֽסֶד־אֱ֝לֹהִ֗ים עוֹלָ֥ם וָעֶֽד׃
51:11 אוֹדְךָ֣ לְ֭עוֹלָם כִּ֣י עָשִׂ֑יתָ * וַאֲקַוֶּ֥ה שִׁמְךָ֥ כִֽי־ט֝֗וֹב נֶ֣גֶד חֲסִידֶֽיךָ׃
