60:2 שִׁמְעָ֣ה אֱ֭לֹהִים רִנָּתִ֑י * הַ֝קְשִׁ֗יבָה תְּפִלָּתִֽי׃
60:3 מִקְצֵ֤ה הָאָ֨רֶץ ׀ אֵלֶ֣יךָ אֶ֭קְרָא בַּעֲטֹ֣ף לִבִּ֑י * בְּצוּר־יָר֖וּם מִמֶּ֣נִּי תַנְחֵֽנִי׃
60:4 כִּֽי־הָיִ֣יתָ מַחְסֶ֣ה לִ֑י * מִגְדַּל־עֹ֝֗ז מִפְּנֵ֥י אוֹיֵֽב׃
60:5 אָג֣וּרָה בְ֭אָהָלְךָ עוֹלָמִ֑ים * אֶֽחֱסֶ֨ה בְסֵ֖תֶר כְּנָפֶ֣יךָ סֶּֽלָה׃
60:6 כִּֽי־אַתָּ֣ה אֱ֭לֹהִים שָׁמַ֣עְתָּ לִנְדָרָ֑י * נָתַ֥תָּ יְ֝רֻשַּׁ֗ת יִרְאֵ֥י שְׁמֶֽךָ׃
60:7 יָמִ֣ים עַל־יְמֵי־מֶ֣לֶךְ תּוֹסִ֑יף * שְׁ֝נוֹתָ֗יו כְּמוֹ־דֹ֥ר וָדֹֽר׃
60:8 יֵשֵׁ֣ב עוֹלָם לִפְנֵ֣י אֱלֹהִ֑ים * חֶ֥סֶד וֶ֝אֱמֶ֗ת מַ֣ן יִנְצְרֻֽהוּ׃
60:9 כֵּ֤ן אֲזַמְּרָ֣ה שִׁמְךָ֣ לָעַ֑ד * לְֽשַׁלְּמִ֥י נְ֝דָרַ֗י י֣וֹם ׀ יֽוֹם׃
