81:1 אֱ‍ֽלֹהִ֗ים נִצָּ֥ב בַּעֲדַת־אֵ֑ל * בְּקֶ֖רֶב אֱלֹהִ֣ים יִשְׁפֹּֽט׃
81:2 עַד־מָתַ֥י תִּשְׁפְּטוּ־עָ֑וֶל * וּפְנֵ֥י רְ֝שָׁעִ֗ים תִּשְׂאוּ־סֶֽלָה׃
81:3 שִׁפְטוּ־דַ֥ל וְיָת֑וֹם * עָנִ֖י וָרָ֣שׁ הַצְדִּֽיקוּ׃
81:4 פַּלְּטוּ־דַ֥ל וְאֶבְי֑וֹן * מִיַּ֖ד רְשָׁעִ֣ים הַצִּֽילוּ׃
81:5 לֹ֤א יָֽדְע֨וּ ׀ וְלֹ֥א יָבִ֗ינוּ בַּחֲשֵׁכָ֥ה יִתְהַלָּ֑כוּ * יִ֝מּ֗וֹטוּ כָּל־מ֥וֹסְדֵי אָֽרֶץ׃
81:6 אֲ‍ֽנִי־אָ֭מַרְתִּי אֱלֹהִ֣ים אַתֶּ֑ם * וּבְנֵ֖י עֶלְי֣וֹן כֻּלְּכֶֽם׃
81:7 אָ֭כֵן כְּאָדָ֣ם תְּמוּת֑וּן * וּכְאַחַ֖ד הַשָּׂרִ֣ים תִּפֹּֽלוּ׃
81:8 קוּמָ֣ה אֱ֭לֹהִים שָׁפְטָ֣ה הָאָ֑רֶץ * כִּֽי־אַתָּ֥ה תִ֝נְחַ֗ל בְּכָל־הַגּוֹיִֽם׃
