(Messias rex, sacerdos victor)
109:1 Dixit Dóminus Dómino meo: «Sede a dextris meis, * donec ponam inimícos tuos scabéllum pedum tuórum».
109:2 Sceptrum poténtiæ tuæ proténdet Dóminus ex Sion: * «Domináre in médio inimicórum tuórum!
109:3 Tecum principátus die ortus tui in splendóre sanctitátis: * ante lucíferum, tamquam rorem, génui te». —
109:4 Jurávit Dóminus et non pænitébit eum: * « Tu es sacérdos in ætérnum secúndum órdinem Melchísedech».
109:5 Dóminus a dextris tuis: * cónteret die iræ suæ reges.
109:6 Judicábit natiónes, acervábit cadávera; * cónteret cápita late per terram.
109:7 De torrénte in via bibet, * proptérea extóllet caput.
