(Gratiarum actio pro salute impetrata)
117:1 Grátias ágite Dómino, quia bonus est; * quia in ætérnum misericórdia ejus.
117:2 Dicat domus Israël: * In ætérnum misericórdia ejus.
117:3 Dicat domus Aaron: * In ætérnum misericórdia ejus.
117:4 Dicant qui timent Dóminum: * In ætérnum misericórdia ejus.
117:5 De tribulatióne invocávi Dóminum; * exaudívit me Dóminus et liberávit me.
117:6 Dóminus mecum est: non tímeo; * quid fáciat mihi homo?
117:7 Dóminus mecum est, adjútor meus, * et ego confúsos vidébo inimícos meos.
117:8 Mélius est confúgere ad Dóminum, * quam confídere in hómine.
117:9 Mélius est confúgere ad Dóminum * quam confídere in princípibus.
117:10 Omnes gentes circumvenérunt me: * in nómine Dómini contrívi eos.
117:11 Undique circumvenérunt me: * in nómine Dómini contrívi eos.
117:12 Circumvenérunt me sicut apes; † adussérunt, sicut ignis spinas: * in nómine Dómini contrívi eos.
117:13 Pulsus, impúlsus sum, ut cáderem; * sed Dóminus adjúvit me.
117:14 Robur meum et fortitúdo mea est Dóminus; * et factus est mihi salvátor.
117:15a Vox exsultatiónis et salútis * in tabernáculis justórum:
117:15b Déxtera Dómini fórtiter egit, † (16) déxtera Dómini eréxit me, * déxtera Dómini fórtiter egit.
117:17 Non móriar, sed vivam; * et enarrábo ópera Dómini.
117:18 Castigávit, castigávit me Dóminus, * sed morti non trádidit me.
117:19 Aperíte mihi portas justítiæ: ingréssus per eas grátias agam Dómino. * (20) Hæc est porta Dómini, justi intrábunt per eam.
117:21 Grátias agam tibi, quod audísti me, * et factus es mihi salvátor.
117:22 Lapis, quem reprobavérunt ædificántes, * factus est caput ánguli.
117:23 A Dómino factum est istud; * est mirábile in óculis nostris.
117:24 Hic est dies quem fecit Dóminus; * exsultémus et lætémur de eo.
117:25 O Dómine, salvum fac; † o Dómine, da prosperitátem! * (26a) Benedíctus qui venit in nómine Dómini;
117:26b Benedícimus vobis e domo Dómini. * (27a) Deus est Dóminus, et illúxit nobis.
117:27b Ordináte pompam cum fróndibus densis * usque ad córnua altáris.
117:28 Deus meus es tu, et grátias ago tibi; * Deus meus, láudibus te extóllo.
117:29 Grátias ágite Dómino, quia bonus est; * In ætérnum misericórdia ejus.