[Lectio1]
Incipit Hábacuc Prophéta
!Hab 1:1-4
1 Onus quod vidit Hábacuc prophéta. 
2 Usquequo, Dómine, clamábo, et non exáudies? vociferábor ad te, vim pátiens, et non salvábis? 
3 Quare ostendísti mihi iniquitátem et labórem, vidére prædam et injustítiam contra me? et factum est judícium, et contradíctio poténtior? 
4 Propter hoc laceráta est lex, et non pervénit usque ad finem judícium; quia ímpius prǽvalet advérsus justum, proptérea egréditur judícium pervérsum.

[Lectio2]
!Hab 1:5-7
5 Aspícite in géntibus, et vidéte, admirámini et obstupéscite; quia opus factum est in diébus vestris, quod nemo credet cum narrábitur; 
6 quia ecce ego suscitábo Chaldǽos, gentem amáram et velócem, ambulántem super latitúdinem terræ, ut possídeat tabernácula non sua. 
7 Horríbilis et terríbilis est: ex semetípsa judícium et onus ejus egrediétur.

[Lectio3]
!Hab 1:8-10
8 Levióres pardis equi ejus, et velocióres lupis vespertínis: et diffundéntur équites ejus; équites namque ejus de longe vénient, volábunt quasi áquila festínans ad comedéndum. 
9 Omnes ad prædam vénient, fácies eórum ventus urens; et congregábit quasi arénam captivitátem. 
10 Et ipse de régibus triumphábit, et tyránni ridículi ejus erunt; ipse super omnem munitiónem ridébit, et comportábit ággerem, et cápiet eam.
