[Officium]
S. Hilari Papæ et Confessoris

[Rank]
;;Duplex;;3;;vide C4b-1

[Rule]
vide C4b-1;
9 lectiones

[Name]
Hílari
(sed communi Summorum Pontificum)
Hílarum

[Lectio4]
Hilarus, natióne Sardus, patre Crispino génitus, post sancti Leónis transitum Románæ Ecclésiæ Póntifex factus est. Eum adhuc diaconum idem Leo legatum destinavit pro Ephesina synodo celebranda. Sed cum Dioscori, Alexandríni epíscopi, furóre per vim et metum Ephesi patrarentur indigna, Hilarus vix effugiens per ínvia loca et multa perícula, divína ope liberátus, ad Leónem revérsus est. Póntifex autem renuntiátus, nihil antíquius hábuit quam quæ contra hæréticos constitúta fúerant suo decréto firmare. Quamóbrem encyclicam epístolam scripsit de damnatióne Nestorii et Eutychetis, ac trium præcipuorum confirmatióne conciliorum.

[Lectio5]
Ab eo invitátus Victorinus, natióne Aquitanus, Paschalem cursum cautissima indagatione compósuit. Ecclesiásticæ disciplínæ retinentissimus, nullum vóluit epíscopum per ecclésias consecrári, præter Metropolitani consensum, nec epíscopum quempiam relícta própria ecclésia, ad áliam transférri, neque transcendi términos a Pátribus constitutos. Leontium Arelatensem epíscopum suæ sedis vicarium constítuit per Gallias, cui sollicitúdinem in congregandis quotánnis epíscopis delegavit. Ecclésiæ prædia, quæ neque desérta, neque inutilia essent, quibus plurimórum necessitátibus subveniretur, alienari, nisi prius apud Concílium alienationis causa dicta, prohibuit; aliáque complúra sancte decrévit in ea synodo quam apud sanctam Maríam Majórem cœgit.

[Lectio6]
Anthemium imperatórem, cum Philotheus Macedonianus, ejus famíliaritáte suffultus, nova diversarum conciliabula sectarum in Urbem conaretur inducere, apud beatumPetrum Apostolum, palam ne id fíeret objurgando cohibuit: in tantum ut ea non fore introducenda promiserit imperátor, interposito étiam juramento. Fecit in Constantinianæ basílicæ baptisterio oratoria quátuor, nempe sanctæ Crucis, sancti Joánnis Baptístæ, sancti JoannisEvangelistæ, et sancti Stéphani, ac ínsuper bibliothecas duas. Monastérium constrúxit una cum bálneo et prætorio, ad sanctum Lauréntium foris, alterumque in Urbe ad Lunam. Plura atque magnifica tum ália ornamenta ex auro, argénto, lapidibusque pretiósis, sacris locis cóntulit. Constítuit in Urbe ministeriales, qui præfixas obirent stationes. Pro commúni sacerdótum Dómini concdrdia sollícite procuravit, ne sua auderent quærére, sed quæ essent Christi studerent obtinere. Demum ipse córpore solútus, ábiit in cœlum regnaturus cum Christo, quarto Idus Septémbris, sub imperatóribus Leóne et Anthemio; ejúsque corpus sepúltum fuit ad sanctum Lauréntium in crypta juxta corpus beáti Xysti. Una ordinatióne mense Decémbri creávit presbyteros vigínti quinque, diáconos sex, epíscopos per divérsa loca vigínti duos. Apostólicæ Sedis régimen ténuit annos sex, menses novem, dies vigínti et octo.
