[Officium]
S. Nicolai I Papæ et Confessoris

[Rank]
;;Duplex;;3;;vide C4b

[Rule]
vide C4b;
9 lectiones

[Name]
Nicolái
(sed communi Summorum Pontificum)
Nicoláum

[Lectio4]
Nicoláus hujus nóminis primus, natióne Románus, patre Theodoro regionario, Benedícto tértio e vivis subláto, mirábili ómnium consensióne, anno Christi octingentésimo quinquagésimo octávo, a clero eléctus, et ex basílica príncipis Apostolórum, in qua latitabat, per vim edúctus, adductusque in Lateranense patriarchium, Románus Póntifex renuntiátus est. A prima puerítia pietátem omnemque virtútem cóluit, eósque in sacris lítteris progréssus fecit, ut eum Sérgius secúndus in ipso eódem patriarchio, Ecclésiæ Románæ subdiaconum, Leo vero quartus diaconum creaverint, Benedíctus demum tértius ejus consílio et ductu univérsam Ecclésiam administraverit.

[Lectio5]
Exstant plúrimæ ab eo scriptæ epístolæ, in quibus errantes corréxit, supérbos depressit, oppréssos recreavit. Epíscopos, reges, imperatores in offício continuit: Joánnis Ravennatis archiepiscopi contumaciam fregit: Hincmarum Rhemensem archiepiscopum de injústa Rhotaldi epíscopi Suessionensis depositione ácriter reprehendit; ejus ea de re, nec non Synodi Sylvanectensis judícium abrogavit; tum apud sanctam Maríam Majórem in pervigilio Nativitátis Domínicæ Missárum solémnia explens, epíscopum ipsum pristinæ dignitati, et paulo post suæ sedi plene restítuit. Lotharium regem, qui rejecta legítima uxore Theutberga, Waldradam concubinam duxerat intentato anathemate, ad saniorem mentem redúxit. Electionem Photii láici hóminis reprobavit, et patriarcham Ignatium in prístinam sedem restítuit. Ecclésiæ demum Románæ jura ita deféndit, ut singulæ illíus epístolæ quasi tótidem fortíssima Sedis apostólicæ munimenta esse videántur.

[Lectio6]
Cum illíus zelus intra tunc præscriptos Ecclésiæ fines continéri non posset, ad conversiónem infidélium applicuit ánimum, fecitque ut amplissima Bulgarorum gens, una cum rege, ad Christi fidem conversa, Ecclésiæ Románæ, frendente licet imperatóre schismatico, accesserit. Óperam quoque suam privátis pietátis offíciis sédulo navávit. Hinc descrípta ómnium indigentium nómina apud se habére vóluit, ut síngulis accuratius succurreret. Reparandis étiam ornandisque basilicis Urbis, præcípue Lateranénsi patriarchio liberalem manum apposuit, et nullis súmptibus pepércit. Inito demum décimo pontificátus anno, in cœlum migrávit, et in Vaticáno sepúltus est.

[Oratio 3]
@Commune/C4-1
