[Officium]
S. Alberici, ij. Abbatis Cistercii

[Rank]
;;MM. maj.;;4;;ex C5b

[Rule]
12 lectiones

[Name]
Albérici

[Lectio5]
Ex parvo Exordio Cœnobii et Ordinis Cisterciensis
!Cap. 9. et seq.
Viduáta suo Pastóre (Robérto) Cisterciénsis Ecclésia convénit ac regulári electióne quemdam fratrem, Alberícum nómine, in Abbátem sibi promóvit; virum scílicet litterátum, in divínis et humánis satis gnarum, amatórem régulae et fratrum, quique Prióris offícium, et in Molisménsi, et in illa diútius gerébat Ecclésia, multúmque diu niténdo laboráverat‚ ut ad illum de Molísmo transmigrárent locum, et pro hoc negótio multa oppróbria, cárcerem et vérbera perpéssus fúerat.

[Lectio6]
Cura pastoráli, licet multum renítens, suscépta, cogitáre cœpit, véluti vir mirábilis prudéntiæ, quæ tribulatiónum procéllæ, domum sibi créditam aliquándo concutiéntes vexáre possent: et præcávens in futúrum, cum consílio fratrum transmísit Mónachos duos Joánnem et llbódum Romam, Dóminum Paschálem per eos exórans ut Ecclésia sua sub Apostólicæ protectiónis alis, quiéta et tuta ab ómnium Ecclesiasticórum sæculariúmve pressúra personárum perpétuo sedéret. Qui fratres Romam próspere iérunt et rediérunt, reportántes ejúsdem Apostólici privilégium juxta votum Abbátis sociorúmque ejus, per ómnia exarátum Troyæ décimo quarto Kaléndas Maji anno ab incarnatióne Dómini millésimo centésimo.
	
[Lectio7]
Dehinc sanctus Abbas et fratres ejus non immémores sponsiónis suæ, Régulam beáti Benedícti in illo loco ordináre, et unanímiter statuérunt tenére; rejiciéntes a se quidquid tam in victu quam in vestítu puritáti Régulæ adversabátur; sicque exúti véterem hóminem, novum se induísse gaudébant, ita ut, spretis sæculi divítiis, cœperint cum páupere Christo esse páuperes Christi mílites, in tantum ut fere omnes vidéntes et audiéntes vitæ eórum asperitátem insolítam, et quasi inaudítam plus corde et córpore elongáre, quam eis approximáre se festinábant‚ et de perseverántia ipsórum titubáre non cessábant.

[Lectio8]
Sed Dei misericórdia, qui hanc milítiam spirituálem suis inspirávit, ad multórum proféctum egrégie eam póstea amplificáre et consummáre non cessávit. Vir autem Domini Alberícus in schola Christi per novem annos et dimídium regulári disciplína felíciter exercitátus, migrávit ad Dóminum séptimo Kaléndas Februárii anno Dómini millésimo centésimo séptimo‚ fide et virtútibus gloriósus et ídeo in vita ætérna a Deo mérito beándus; cui succéssit quidam frater Stéphanus nómine, Anglus natióne, qui et ipse cum áliis de Molísmo advénerat, quique amátor Régulæ et loci erat.
