@Sancti/02-23r

[Rule]
vide C4a;mtv
3 Lectiones

[Lectio1]
@CommuneCist/C4:Lectio1

[Lectio2]
Petrus, orígine Ravénnas, ténera adhuc ætáte utróque orbátus parénte, sub áspera fratris tutéla duram servitútem exércuit. Inde a Damiáno, áltero fratre, sortem illíus miseráto, a quo cognoméntum sumpsísse fertur, benígne recéptus, ejus cura lítteris erudítur, in quibus et brevi stupéndos fecit progréssus, et póstmodum eas cum laude dócuit. Adhuc in sæculo degens, mínime sæculáriter vixit: incredíbili in páuperes misericórdia præditus, sui córporis sevérus castigátor exístens, oratióni vacábat assídue. Majóris tamen perfectiónis stúdio flagrans in Avellanénsi cœnóbio Ordini Monachórum sanctæ Crucis Fontis Avelláni nomen dedit. Cui famíliæ cum póstea præféctus fuísset, eam novis extrúctis domicíliis et sanctis; institútis ita auxit, ut alter ejus Ordinis parens jure sit hábitus. Divinórum contemplatióne, córporis maceratiónibus, ceterísque spectátæ sanctimóniæ exémplis præcéllens, utilíssimam óperam restituéndæ collápsæ disciplínæ Ecclesiásticæ, morúmque sanctitáti in plebe Christiána promovéndæ impéndit. His motus Stéphanus nonus Póntifex Máximus, eum, licet invítum, sanctæ Románæ Ecclésiæ Cardinálem, et Epíscopum Ostiénsem creávit.

[Lectio3]
Difficíllimo témpore Romána Ecclésiæ summísque Pontificibus doctrína, legatiónibus, aliísque suscéptis labóribus mirífice ádfuit. Advérsus Nicolaitárum et Simoníacam hæresés ad mortem usque strénue decertávit. Benedícto, et Cadalóo, falsis pontifícibus, fórtiter réstitit. Ravennátes ad débita Románo Pontifici obséquia revocátos sacris restítuit. In província præsértim Urbináte vix ulla fuit Episcopális ecclésia, de qua Petrus non sit bene méritus. Tandem Cardinalátu, et Episcopátu dignitáte depósitis, nihil de prístina juvándi próximos sedulitáte remísit. Jejúnium sextæ Fériæ in honórem sanctæ Crucis, horárias Dei Genitrícis preces, ejúsque die Sábbato cultum propagávit. Demum sanctitáte, doctrína, miráculis, et præcláre actis commendátus, dum e Ravennáte Legatióne redíret, Favéntiæ Octávo Kaléndas Mártii migrávit ad Christum. Ejus corpus ibídem apud Cisterciénses multis miráculis clarum, frequénti populórum veneratióne cólitur.

[Responsory1]
@CommuneCist/C4:Responsory2

[Responsory2]
@CommuneCist/C4:Responsory3

[Responsory3]
@CommuneCist/C4a:Responsory12
