@Sancti/03-07

[Rule]
vide C5a;
12 lectiones
in 1 Nocturno lectiones ex Commune in 2 loco

[Lectio5]
Thomas, Landúlpho cómite Aquináte, et Theodóra Neapolitána, nobílibus parénti-bus natus, quintum annum agens, Mónachis sancti Benedícti Cassinátibus custodiéndus tráditur. Inde Neápolim studiórum causa missus, jam adoléscens Fratrum Prædicatórum Ordinem suscépit. Sed matre ac frátribus id indígne feréntibus, Lutétiam Parisiórum míttitur. 
	
[Lectio6]
Quem fratres in itínere per vim raptum, in arcem castri sancti Joánnis perdúcunt: ubi várie exagitátus, ut sanctum propósitum mutáret, muliérem étiam, quæ ad labefáctandam ejus constántiam introdúcta fúerat, titióne fugávit. Mox beátus júvenis, fléxis génibus ante signum Crucis orans, ibíque somno corréptus, per quiétem sentíre visus est, sibi ab Angelis constríngi lumbos; quo ex témpore omni póstea libídinis sensu cáruit.
	
[Lectio7]
Emíssus e castro per fenéstram, Neápolim redúcitur; unde Romam, póstea Parísium ductus, Philosophíæ ac Theologíæ óperam dedit. Numquam se lectióni aut scriptióni dedit, nisi post oratiónem. In difficultátibus locórum sacræ Scriptúræ, ad oratiónem jejúnium adhibébat. Neápoli cum ad imáginem Crucifixi veheméntius oráret, hanc vocem audívit: Bene scripsísti de me, Thoma; quam ergo mercédem accípies? Cui ille: Non áliam, Dómine, nisi teípsum.

[Lectio8]
Ab Urbáno quarto Romam vocátus, addúci non pótuit, ut honóres accíperet. Archiepiscopátum Neapolitanum étiam deferénte Cleménte quarto Pontífice recusávit. Missus a Gregório décimo ad Concílium Lugdunénse, in monastério Fossæ Novæ Cisterciénsis Ordinis in morbum íncidit, ubi ægró­tus Cántica Canticórum explanávit. Ibídem óbiit quinquagenárius, anno salútis millésimo ducentésimo septuagésimo quarto.