[Officium]
S. Vincentii Kadlubek, Episcopi et Confessoris O.N.

[Rank]
;;Semiduplex;;2.2;;ex C4

[Rule]
ex C4
12 lectiones
in 3 Nocturno Lectiones ex Commune in 2 loco;

[Oratio]
Deus, qui beátum Vincéntium Confessórem tuum atque Pontíficem spretis sæculi pompis humilitátis glória decorásti, § præsta quæsumus: * ut tantæ virtútis proficiéntes exémplo, § ejus méritis cœléstis glóriæ consórtes efficiámur.
$Per Dominum

[Lectio5]
Vincéntius Kádlubek Polónus natus est, ut antíqua acta ferunt, in Villa Karvau Diœcésis Cracoviénsis Palatinátus Sandomirénsis, ex vetustíssima Rosárum família. Patre Bogumíto, matre Benígna, sánguinis claritáte et pietáte illústribus, a quibus in fide Cathólica et in timóre Dómini sancte educátus, plura édidit in ipsis téneris annis sanctitátis specímina, innocéntia morum, jugi orándi stúdio, humilitáte, modéstia ac prompta erga suos paréntes obediéntia. Adoléscens factus, Philosóphicis ac Theológicis stúdiis imbútus, in Académia Cracoviénsi láuream Doctorálem adéptus est, cum litterárum stúdio singulárem pietátem semper cópulans, ótium et pravórum consórtia abhorrens, oratióni addíctus, Sacraménta frequéntans, aliósque Christiánæ pietátis actus forti ánimo exércens.
	
[Lectio6]
Tantæ sanctimónia vitæ captus Fulco Epíscopus Cracoviénsis Vincéntium inter suos cooptávit, ejúsque ópera usus est in regímine suæ Diœcésis. Cum præter exímiam vitæ integritátem, acri étiam polléret ingénio, singulárique prudéntia, Sacerdótio initiátus, evéctus fuit ab eódem Epíscopo ad Præpositúram insígnis Collegiátæ Sandomirénsis, in qua dignitáte omnes sui múneris partes ádeo sancte explévit, ut exémplar factus modéstiæ, castimóniæ, aliarúmque virtútum promerúerit designári a Lefco Albo Polóniæ rege in Oratórem, ut própriam fíliam beátam Saloméam in sponsam dedúceret ad regem Halíciæ. Defúncto intérea Fulcóne Epíscopo Cracoviénsi assúmptus ille fuit ad eándem sedem; Ejúsdem electiónem confirmánte Innocéntio III. Pontífice Máximo.
	
[Lectio7]
In Episcopátu exémplum se præbuit bonórum óperum, et commíssum sibi gregem pascens mónitis, consíliis, sciéntia, verbo et exémplo ita insectátus est, ut pravos populórum mores, et collápsam pietátem in pristínum restitúerit. Cathólicae fídei insígnis Propagátor, et Ecclesiásticae jurisdictiónis vindex acérrimus. Exímia incláruit prudéntia, charitáte, mansuetúdine, et misericórdia in páuperes; zelus Domus Dei ita illum coméderat, ut reparatióni, et opportúnis Ecclesiárum provéntibus impénse cónsulens, nedum ex mensæ Episcopális reddítibus, sed et de hæreditário património illas dotáverit. Exímium vero ejus religiónis arguméntum fuit, dum insígne erogávit pecúlium; ut in Temolo CathedráIis Cracoviénsis lampas accénsa coram Altáris Sacraménto perpétuo asservarétur. 
	
[Lectio8]
Decurrénte vero décimo ejus Episcopátus anno, Evangélicæ  perfectiónis cúpidus, in religiósa castra secédere decrévit, ut cœléstium rerum contemplátioni et rigidióris vitæ Institúto vacáre posset. Hinc forti ánimo, précibus et lácrymis devícta Capítuli, et pópuli Cracoviénsis contradictióne, prævio beneplácito Pontíficis Honórii tértii, ómnia sua dispérsit et dedit paupéribus, et Insígniis Episcopálibus depósitis coram collégio Canonicórum Cracoviénsium nudis pédibus proficíscens per decem leucas se cóntulit ad Cœnóbium Andreoviénse, in quo Monásticam vitam Ordinis Cisterciénsis proféssus est: ibíque regulári observántia, jejúniis et cœléstium rerum contemplátione quinque júgiter annis praelúxit, plúribus étiam supernaturálibus donis a Deo locupletátus. Plenus tandem diérum et óperum, pretiósam in conspéctu Dómini mortem óbiit octáva Mártii anno millésimo ducentésimo vigésimo tértio. Fama sanctitátis et miraculórum clarus. Ecclesiásticum ejus cultum rite probátum, confirmávit Clemens XIII. Póntifex Máximus. Qui et has lectiónes próprias ejus in honórem recitándas concéssit.
