@Sancti/07-20

[Lectio1]
@CommuneCist/C5:Lectio1 in 2 loco

[Lectio2]
Hierónymus Æmiliánus, patrícia stirpe, Venétiis ortus, ab adolescéntia milítiæ addíctus, difficíllimis reipúblicæ tempóribus Castronóvo ad Quarum in móntibus Tarvisínis præfícitur. Capta ab hóstibus arce, ipse in tetérrimum cárcerem detrúditur, unde a beatíssima Virgine, ejus précibus exoráta‚ mirabíliter liberátus, Venétias revérsus, cœpit pietátis stúdia impénsius cólere. In páuperes mire effúsus, sed puerórum præsértim misértus, qui paréntibus orbáti‚ egéni et sórdidi per urbem vagabántur, illos in aedes a se condúctas recépit, de suo aléndos et Christiánis móribus imbuéndos. Mox ópera beáti Cajetáni et Petri Caráfæ‚ qui póstmodum Paulus quartus fuit, in hospítium incurabílium addúctus est, in quo órphanos simul educáret, et ægrótis pari charitáte inservíret. Eorúmdem hortátu in próximam continéntem proféctus, Bríxiæ primum, deínde Bérgomi nova eréxit orphánotrophía. Somáschæ demum subsístens, in húmili pago agri Bergoménsis sibi ac suis ibídem sedem constítuit, formámque indúxit congregatiónis, cui proptérea a Somáscha nomen factum, quam sub inde auctam et propagátam nedum orphanórum regímini et ecclesiárum cúltui, sed et adolescéntium institutióni addíctam sanctus Pius quintus inter religiósos Ordines adscrípsit.

[Lectio3]
Orphanis colligéndis inténtus Mediolánum proficíscitur atque Ticínum, et utrobíque collectis agmínibus puerórum‚ nobílibus viris favéntibus, novas domos próvide constítuit. Inde Somáscham redux ómnibus ómnia factus a nullo abhorrébat ópere, quod in próximi bonum cedére prævidéret. Agrícolis immíxtus per agros sparsis, dum se illis in labóribus adjutórem præbet, mystéria fídei explicábat, puerórum cápita, porrígine fœda abstérgens curábat, putridísque rusticórum vulnéribus medebátur eo succéssu, ut grátia curatiónum donátus censerétur. In monte, qui Somáschæ ímminet, repérta specu, in illam se ábdidit, ubi se flagéllis cædens‚ dies íntegros jejúnus tránsigens‚ oratióni insístens, sui aliorúmque noxárum pœnas luébat. Tandem contrácto morbo, dum témpore contagiónis ægrotántibus inservíret, et vita functos própriis húmeris ad sepultúram deférret, pretiósam vitam pretiosióri morte finívit anno millésimo quingentésimo trigésimo séptimo, quem plúribus in vita et post mortem miráculis illústrem Clemens décimus tértius in númerum Sanctórum rétulit.
